Un selo gastronómico que nace do noso litoral e que se integra nos costumes e no traballo da hostalería de Miño.
O Concello de Miño, co investimento das axudas de Estratexias de Desenvolvemento Local Participativo (EDLP) aprobadas pola Consellería do Mar da Xunta de Galicia ao GALP Golfo Ártabro Norte no marco do Fondo Europeo Marítimo e de Pesca, desenvolveu un programa formativo en cociña mariñeira dirixido aos profesionais da hostalería do municipio.
Trátase dun proxecto participativo orientado a fortalecer as capacidades técnicas do sector, fomentar o uso dos produtos do mar de proximidade e impulsar a innovación gastronómica baseada na sostibilidade e na posta en valor da identidade mariñeira do territorio.
A iniciativa conta co apoio da Confraría de Pescadores de Miño e da Reserva da Biosfera Mariñas Coruñesas e Terras do Mandeo, consolidándose como unha ferramenta para a mellora continua da proxección e competitividade da hostalería de Miño.
A primeira fase do proxecto centrase na formación especializada dos profesionais da hostalería do Concello de Miño a través de obradoiros de Cocña Mariñeira. Nas primeiras edicións contaron coa participación do chef Antonio Amenedo (edicións 2021–2022) e neste ano, as formacións foron impartidas pola cociñeira Nair González (edición 2026).
Nestes espazos formativos traballouse o tratamento do produto do mar, técnicas de cociña mariñeira, aproveitamento integral da materia prima e deseño de propostas gastronómicas sostibles, sempre desde unha perspectiva de identidade territorial e innovación culinaria.
Na segunda fase do programa, o coñecemento adquirido nos obradoiros trasládase á práctica diaria dos establecementos hostaleiros, favorecendo a súa aplicación real na oferta gastronómica local.
Nas primeiras edicións conseguiuse a incorporación do Bolo Mariñeiro nas cartas dos restaurantes participantes, consolidándoo como elemento identitario da gastronomía do municipio.
Nesta nova edición, os hostaleiros desenvolverán un pincho mariñeiro elaborado con produto de proximidade, que será presentado no marco dunha ruta gastronómica local, denominada Fin de Semana do Pincho Mariñeiro durante os días 17, 18 e 19 de abril. O obxectivo deste evento é dinamizar o sector, promover o consumo de produto do mar e potenciar a oferta turística e culinaria do territorio.
Patrocina
